Слушањето музика со слушалки е широко распространето и многу почитувано од страна на љубителите на хај-фај звукот. Сето ова е поврзано со некои основни предности, како што се, на пример, намалување на најмало можно ниво на влијанието на шумовите и звуците од околината и исклучително квалитетниот звук понуден во целиот чуен аудиофреквенциски опсег од 20Hz, па сe до 20kHz. Слушателот целосно може да ужива во целиот динамички опсег. За сето ова да го почувствувате (доживеете) на друг начин, ќе ви треба многу скапа и квалитетна хај-фај аудиоопрема. Со помош на засилувачот за слушалки можете да си овозможите пријатен одмор во добра и пријатна музика без да ги вознемирувате останатите членови во вашиот дом. Единствен недостаток, ако така може да се каже, на овој стереоаудиозасилувач е што поседува само еден излез за приклучување на слушалки, па со тоа е оневозможено истовремено слушање музика на двајца, па и повеќе слушатели. Влезот на овој стереозасилувач за слушалки со помош на квалитетен стереоаудиокабел директно се приклучува (поврзува) на излезот од квалитетен ЦД, ДВД или некој друг извор на аудиосигнал. Од квалитетот на приклучениот аудиоизвор и од квалитетот на приклучените слушалки на излезот од засилувачот во најголем дел ќе зависи квалитетот на звукот, односно квалитетот на репродуцираната музика. Ако овие предуслови ги исполните и за слушање употребите оригинално квалитетно ЦД со музика по ваш избор, еднаш кога ќе ја слушнете музиката на овој засилувач тешко дека ќе посакате да слушате музика на некој друг аудиосистем.