На почеток да напоменам дека до оштетување на звучниците може да дојде од различни причини. Приклучените звучници на излезот од засилувачот понекогаш се изложени на влијанието на несакани сигнали кои можат да се појават поради некоја неисправност или прегорување на некоја компонента во самиот засилувач. Поради тоа, на излезот од засилувачот може да се појави поголема вредност на излезниот DC напон (од напојувањето) и разни несакани осцилации. Сите овие несакани напони негативно дејствуваат врз звучниците и тие претставуваат причинители за негово лошо работење, а во краен случај и за негово уништивање – прегорување на неговата намотка или оштетување на мембраната. За да ја спречите оваа несакана појава, на излезот од засилувачот треба да поставите електронско коло кое во даден момент ќе реагира и ќе го заштити звучникот. Едно такво електронско коло, можете да изработите со помош на овој проект. Оваа заштита може да се употреби кај засилувачи кои не поседуваат никаква заштита, а на излезот испорачуваат моќност до 500W на 4 ома или 8 ома. Исто така, ова заштита располага со светлинска индикација со ЛЕД диода/ти. Доколку свети зелената лед диода со засилувачот сè е во ред и звучникот е приклучен на излезот од засилувачот, доколку свети црвената лед диода звучникот не е вклучен на излезот од засилувачот, бидејќи има некој проблем во истиот, односно на неговиот излез се појавил поголем DC напон (>±1Vdc).