Во последните десетина години, електромагнетната усогласеност стана важен аспект во дизајнот на електричните кола. За разлика од минатото, кога дизајнерите имаа обврска да обезбедат ниско ниво на емисија и висок степен на нечувствителност на надворешен шум само за колата кои работат со многу високи фреквенции, денес таа обврска се однесува практично на сите електрични уреди. Европскиот пазар изобилува со комерцијални филтри по најразлични цени. Крајниот корисник секогаш се судира со два проблема кога, од понуденото изобилство, треба да направи избор. Прво, треба да го одбере вистинскиот филтер, а потоа одбраниот филтер да го експлоатира на начин кој, повеќе или помалку, ќе ги задоволи условите дадени во препораките на производителот. Од тие причини, логично се наметнува потребата за изработка на универзален мрежен филтер. За жал, и овде се наметнува еден проблем – универзалноста на филтерот може да се запази само со внимателен избор на компонентите.