Не помина долго време откако ги заменивте старите добри CD ROM читачи со CD рикордери. Потоа сигурно останавте во тренд, па на местото на CD снимачот поставивте DVD снимач. Сум видел конфигурации кај пријатели кои носталгично ги чуваат сите модели на оптички уреди и ги редат во висина, како во осумдесеттите и деведесеттите кога беше модерно (читај езотерично) да се има што повисок музички систем, со што повеќе музички компоненти во негов состав. Но, дојде денот кога снема повеќе место во куќиштето на вашиот персонален компјутер, па “најстариот во фамилијата” – CD ROM читачот, мора да оди на заслужен одмор. Единствен предуслов за обезбедување автономија на вашиот CD плеер е постоењето на две командни копчиња (тастери) за соодветни команди на предната командна плоча на уредот: копче за PLAY (Start) и копче за внес (исфрлање) на дискот, EJECT. Воедно, копчето за “старт” служи и за брзо придвижување низ музичкиот материјал (forward), а копчето за исфрлање служи и како “стоп” команда. Изведбите на CD плеери кои имаат само едно копче за внес, односно исфрлање на дискот, (eject/stop) не можат да се адаптираат за музичка репродукција надвор од компјутерот.