Во редакцијата на ЕМИТЕР се јавија неколку читатели со слична желба да објавиме проект на ФМ-радиоприемник кој нема да биде многу сложен, да е изработен со електронски компоненти кои лесно можат да се најдат на нашиот пазар и да има многу добри карактеристики кои можат да се постигнат во аматерски услови. Конструкцијата на ФМ-радиоприемникот од овој проект е базирана на употреба на неколку многу интересни квалитетни интегрирани кола. За следењето на ФМ-радиостаниците кај овој радиоприемник се користат стереослушалки со импеданса од 2×32Ω, чиј кабел (спроводник) воедно може да послужи како антена. Исто така, за љубителите кои сакаат некоја ФМ-радиостаница да ја слушаат преку звучници, овој уред го овозможува тоа. Тоа значи дека на местото каде што се приклучуваат слушалките можете да приклучите звучници со моќност од 1W или поголема со импеданса од 4…8 Ω или поголема.